Visita ao Plantío de Souto Calvo (San Claudio)

 

Maruxa e Antón da Bodeguiña, 40 anos dedicados ao coidado das árbores

    O día de san Paio, un grupo numeroso de amigos e veciños de Maruxa e Antón de Riveira, iniciamos a nosa particular conquista da natureza, ollando ao lonxe a sen par beleza da ría de Ortigueira no momento preciso en que daba volta a marea e as aves acuáticas se daban un opíparo festín, mentres as árbores da contorna recibían os primeiros raios de sol e unhas nubes ameazaban choiva.

    O paseo entre as 138 variedades de especies arbóreas de aquí e de acolá, procedentes das súas viaxes polo país, recollendo un tano (esqueje), unha semente, unha poliña ou mercando algunha rareza que lles gustaba, foron unha regalía para os sentidos, pois xa sabemos o beneficioso que resulta hoxendía abrazar unha árbore, acariñala e sentir o latexo da terra no noso corazón.

Nesa mañá de domingo nós fomos quen de sentir mágoa polo castiñeiro que morreu polo mal da tinta, pero de congratularnos por saber que Antón ten outros castiñeiros ao que o mal non lles afecta. Quizá a árbore máis exótica que vimos foi a sequoia de Padrón, ou a araucaria da zona dos Andes, talvez a acacia de Sevilla, do parque María Luisa, ou a árbore máis vella, un piñeiro que trouxo de Francia. Aplaudimos a resistencia do pino canario, que cando se queima é capaz de rebrotar de entre as cinzas e, como non! axeonllarnos diante do ginkgo biloba, que foi capaz de sobrevivir á terrible bomba atómica lanzada en Hiroshima e que hoxe é símbolo de paz e resistencia no mundo enteiro.

Cada árbore do plantío ten a súa historia, todos están etiquetados co seu nome, feito artesanalmente en madeira. Cando naceron os netos, os avós plantaron un teixo e un castiñeiro, para celebralo. Por certo, ollo cos teixos, seica son dabondo tóxicos.

Quixeron os nosos amigos compartir cos veciños e visitantes saborosas viandas que degustamos en amable compañía e conversa ata o mediodía en tan idílico lugar.

Centenario da colocación da primeria pedra do Escolar de San Claudio

f: José Álvarez Díaz

        No mármore branco, sobre a lousa azul lemos a inscrición: “En lembranza, homenaxe e gratitude á Sociedad Pro Instrucción, Recreo e Auxilio Mútuo de San Claudio na Habana. Espazo de formación, cultura e convivencia comunitaria (1921 – 2021)".

    O pasado día 18 de Xuño celebrouse, nos xardíns do escolar de San Claudio, un acto con motivo da descuberta da placa conmemorativa pola colocación da primeira pedra do edificio escolar feito o 11 de Xullo do ano 1921, e que por diversos motivos trasladouse a este día, dando continuación as actividades iniciadas pola celebración do centenario o ano pasado, as cales programou e levou a cabo a Asociación Centro Cultural Libro Vivo.

O evento contou coa presenza de Antonio Rodríguez Miranda, secretario xeral de Emigración da Xunta, como patrocinador do acto, coa de Vicente Peña Saavedra, responsable do MECOR, que foi o condutor do mesmo, e coa do alcalde e da corporación de Ortigueira e dos concellos de Mañón, Cariño e Cedeira, os cronistas oficiais de Viveiro, Mañón e Ortigueira, e tamén con representantes de diversas asociacións culturais da comarca e de medios como El Heraldo de Vivero, descendentes e familiares dos que participaron no citado acto de colocación da primeira pedra ou dalgún dos fundadores, así como da veciñanza de San Claudio e incluso doutras parroquias, e tamén pola inesperada e agradecida presenza do ex–presidente de Naturales de Ortigueira, Juan Antonio Orallo, e amigos cubanos residentes nesta comarca.

    Seguindo a programación prevista pola organización, comezouse ás 11 horas coa presentación, por parte de Vicente Peña, do propio secretario Xeral de Emigración que fixo unha exposición dos motivos polas que xustificou a celebración deste evento, e da importancia que tiveron as Sociedades Galegas de Instrución á hora de levar a cabo unha obra educativa que non tivo parangón.

De seguido contestou o Sr. Miranda ás palabras de recoñecemento, vertidas polo presentador cara a el e á propia Secretaría Xeral de Emigración, cun emotivo discurso onde agradeceu a presenza de todos, en particular dos alcaldes, amosando tamén a Libro Vivo, como asociación veciñal organizadora, así como á labor da emigración para con Galicia, coa que se sentiu identificado.

Ao descubrila placa soaron os acordes do himno de Cuba, interpretados, ao saxofón, por Marta Lamigueiro, neta de Gerardo Durán Chao, un dos fundadores e representante da Sociedade en San Claudio, quen emocionou aos presentes coa súa interpretación, continuando coa execución da magnifica peza a Alborada de Veiga.

Descuberta a placa e intercambiado agasallos co Sr. Miranda, o grupo de gaiteiros Os Debotos interpretou o himno galego.

O presidente de Libro Vivo, en nome da sociedade, agradeceu a presenza e intervención de Vicente Peña, de Antonio Rodríguez e dos alcalde e demais asistentes, destacando o traballo feito pola xunta directiva da asociación e dos socios que a manteñen; agradeceu tamén, de maneira particular e persoal a presenza dos asistentes e familiares dalgúns dos que participaron neses actos cen anos antes, aos fillos dos últimos mestres de San Claudio que tiveron a deferencia de asistir, pedindo, por último, aos representantes das institucións, a súa axuda para o mantemento de proxectos coma os de San Claudio, os cales precisan máis do que a veciñanza pode asumir.

Rematou o acto cunha visita ás instalacións do museo e biblioteca, e un ágape de confraternidade, resultando o evento moi animado e concorrido.