Xa vén o entroido!

 

f.: Dolores Asenjo

Peliqueiros no entroido

Xa vén o entroido!

Aínda non estamos recuperados dos excesos de Nadal e xa enchemos as nosas despensas de fariña, azucre e ovos para as larpeiradas propias do entroido. Orellas, filloas, rosquillas e flores encherán as sobremesas dentro de nada, pois co adeus a xaneiro comeza a conta atrás. Nestas datas lémbrome de Evanxelina. Gustábanlle tanto as filloas que comíaas en calquera época do ano.

Por que será que todo o celebramos coa comida? A gastronomía e as festividades van tan acompasadas coma a alegría e a danza. Iso é así en case todas as culturas, pero penso que quizais no noso pobo é un chisco máis esaxerado.

Non obstante, o característico do entroido é a posibilidade, efémera pero real, de ser quen queiramos. Podemos transformarnos nun súper heroe ou heroína, nun animal mitolóxico, nunha árbore, nun edificio emblemático ou emular a esa persoa que tanto admiramos, xa sexa deportista, do mundo da farándula ou alguén relevante na historia, por dicir algo.

E a aqueles que van todo o ano disfrazados, que non son poucos, permítelles por uns días mostrarse tal e como son.

Esa é a maxia do entroido! Gocémola.

por Dolores Asenjo Gil