LETRAS GALEGAS SAN CLAUDIO 2023

 

Cartaz: Marta Díaz Painceira

Organizado pola Asociación Cultural LIBRO VIVO, o venres, 19 da maio, no Escolar ás seis e media da tarde, tivo lugar a charla que Manuel López Foxo deu sobre a vida e a obra do autor homenaxeado este ano, don Francisco Fernández del Riego,  unha pequena homenaxe que lembrou o seu paso por Ortigueira con motivo da Universidade Popular no ano 1990.

Presentou a López Foxo a nosa veciña Pilar, cunhas agarimosas palabras. Falou así:

Presentar a Manolo, nesta súa casa, é como pechar os ollos, e revivir toda a nosa mocidade e os tempos en que San Claudio aínda era un verxel, coas súas hortas traballadas e os lugares cheos de xente.

Vou facer un breve repaso das súas obras literarias e agradecerlle de corazón que nos achegue á figura de don Francisco Fernández del Riego, do que é bo coñecedor.

Entre os anos 1990-1991, Manolo vai publicando semanalmente na Voz de Ortigueira entrañables artigos, que posteriormente don David Fojo recollería  nun fermoso libro. O PAÍS DE NÓS.

O libro, que fala da nosa terra e da nosa xente, saíu do prelo o día 30 do mes das castañas no 1991, un tempo no que as mazás do faiado sabían a gloria e tamén se xuntaba a xente para esfollar as espigas de millo e arar a terra para sementar. Un libro fermosísimo, de recomendada lectura, sobre todo para a xente da parroquia.

Manolo nace na Rocha no ano 1960, e levou a cabo un amplo labor cultural cando foi Concelleiro polo BNG. Fundador da Asociación Ramón Cabanillas, Coordinador da Universidade Popular de Ortigueira, onde como vemos no cartaz, presentou a Fernández del Riego, na conferencia de clausura.  Foi tamén Presidente de Edicións “O Paporroibo”, libros que temos na nosa Biblioteca e que fomos lendo no Club de Lectura. Libros que hoxendía son unha xoia.

Manolo ten numerosas publicacións: “Prosas Apaixonadas”,“As Letras Galegas na Voz de Ortigueira”, “Ortigueira na Cultura Galega”, “Os vellos. A memoria da vida e unha cultura que se perde”, un ensaio sobre o libro de José Luís Sampedro: “Real Sitio ou a conquista das liberdades” e o extraordinario poemario: “Cómaros de mel e rosas”. “O pracer de reler” é o seu último libro de momento.

Comprometido co nacionalismo galego, foi concelleiro e portavoz municipal do BNG entre os anos 1987-1992.  A finais do 1993 entrou a traballar na oficina parlamentar do BNG na Deputación da Coruña, onde sigue. Na actualidade vive na Terra de Trasancos, está casado coa poetisa Medos Romero, que é Premio Nacional de Poesía; e hoxe temos o gusto de escoitalo. Grazas, Manolo por vir a esta túa casa, por encher de cultura este espazo centenario que espertará en ti moitas lembranzas...

f.: Iván Rodríguez

Pilar (d) presentando a López Foxo (i).

Abofé que foi unha conferencia preciosa, sen ler ningún papel, a voz de Manolo, a súa prodixiosa memoria e o saber conectar có público asistente que enchía o local e as anécdotas que contou, fixeron do día unha tarde máxica e inesquecible.

A charla distendida de Foxo, foi unha viaxe no tempo pola vida de Fernández del Riego, dende a súa infancia por terras de Lourenzá, os seus amigos da xuventude entre os que se atopaba Álvaro Cunqueiro, os estudios en Santiago e Madrid, o paso pola Guerra Civil, as miserias da posguerra, Presidente da editorial Galaxia, Fundación Penzol, o traballo realizado en ambas institucións, Partido Galeguista, amigo dos amigos fosen da ideoloxía que fosen. Toda unha traxectoria vital que o levou a proclamar “O día das Letras Galegas”, hai xa sesenta anos, e que neste ano se lle dedican a el con todo merecemento.

A continuación Fina Balseiro presentou a Bea Luengo, que nos acompañou no acto e que expón as súas fotografía durante todo este mes no Escolar.

f.: Iván Rodriguez

Pilar (i), Fina (ci), Manolo (cd) e Bea (d), momentos antes de comezar o acto.

Bea é unha artista que se deu a coñecer no noso Concello cando foi a presentación do cartaz para o Festival do Mundo Celta 2023, que vemos aí exposto, e todos nos preguntamos: Quen é esta moza?  Bea é  deseñadora gráfica-editorial e profesora. Vive en Ortigueira, traballando e unindo a educación, a beleza e o arte. 
Graduada en Bellas Artes na Universidade Complutense de Madrid, no 2014, amplía os seus estudos en Francia, e fai varios masters  de fotografía e profesorado en Santiago.
Ten participado en varias exposicións colectivas, feiras e festivais, e queda finalista en varios certames internacionais. No 2018 gana o premio de publicación “Fotolibro<40”. Tamén presenta o libro e Atlas Ivlia. E tal como podemos contemplar hoxe aquí, tamén é poeta. Unha graza que poucos mortais acadan.
A continuación presentou a Diego Pérez, que non puido asistir ao acto por cuestións de traballo, e que tamén expón en conxunto con Bea.
Todos nos preguntábamos quen será J. Peak, e supoñíamos que era un inglés que se asentara por aquí. Así firma os seus cadros.
       Ata que alguén nos aclarou que se trataba dun rapaz que tamén escribiu dous libros: Séptima Andaina e a Muiñeira de Apolo, que temos arriba na Biblioteca. Indagamos no asunto e encontramos ao autor, a Diego Pérez Dopico.
       O curriculum deste mozo tamén é amplo, estuda Maestría Industrial en Viveiro, Maxisterio na especialidade de Educación Física na Coruña e Ciencias Relixiosas, carreiras que vai facendo ao tempo que traballa en diferentes oficios que o levan por varios países europeos. Recala en Ortigueira, traballa no departamento de Cultura do Concello e gústalle debuxar aplicando as novas tecnoloxías, pero sobre todo pintar. As súas obras estiveron expostas na Coruña, no Ortegal e na Mariña de Lugo, acadando notable éxito.

Rematou Fina cunha frase del: “Traballade o presente para vivir do pasado que o voso futuro é o máis atractivo e a mellor condición para ser feliz”.

f.: Iván Rodríguez

Fina (d) presentou a Bea e a J. Peak, que expoñen as súas obras durante todo o mes, baixo a atenta mirada de López Foxo (i).

Seguidamente inaugurouse a exposición fotográfica e pictórica PEL FOGAR, de J. Peak e Bea Luengo.

O Club de Lectura premiou a Pilar e a Fina por ser as mellores lectoras que acoden puntualmente á Biblioteca en busca de libros para ler.

f.: Iván Rodriguez

Por ser as lectoras máis comprometidas, Luli (i) fixo entrega dun agasallo floral a Pilar (c) e Fina (d).

Moita xente de San Claudio e da Vila acudiron ao acto, visitaron as instalacións, Biblioteca e Museo, os que non coñecían o recinto quedaron marabillados polo “Centro do Saber”, que agocha tantos tesouros.

f.: Iván Rodríguez

Manolo (i) recibindo de Luli (d) os caraveis para el e a súa compañeira Medos Romero.

Cunha degustación  de produtos da terra, remataron os actos do día, que xa quedan para sempre na memoria dos presentes para gloria e ventura da nosa terra. 

Por Luli Dopico